Selamat Datang

SELAMAT DATANG DI BLOG SAYA "MEJUAH-JUAH KITA KERINA,NANDE-BAPA',TURANG IMPAL,RAS SENINA"

kursor

Jumat, 26 Oktober 2012

(CERITA TANAH KARO ; GANA GANA SARUNGGITGIT)

GANA GANA SARUNGGITGIT

Nai ope denga lit pasar dalin engkahe. Ngelegi sira, ikan dagangen entah kai denga sidebanna kerina i legi alu dalin erlanja. Jelma mbiar denga asum e man ingan simejin-mejin, ntah kerangen bagepe deleng mawen batu pe.
Adi Pa Ngatoi ibahanna sapona barung-barung i tepi dalan perlanja e, kelang-kelang deleng Barus ras deleng Sibayak. Ije ia ringan ras ndeharana. Man perlanja si erberngi i je, i berekenna kudin pinjamen man perdakanen. Janah i bereken perlanja e ka ikan entah pe sidebanna. Piah dungna alu dalin bage enggo bias kegeluhen Pa Ngatoi pagi rebi. Adi pecah kenca kudin, ntah kai akapna i bahan perlanja la sikap, minter i kilangna. Mbiar perlanja lanai i berekenna i je erberngi maka i tahankenna i kilangna.
Sekali paksa turah me ukur Pa Ngatoi ngoto-ngotoi perlanja alu pebiar-biarsa. Ibar-barina sada sarunggitgit dua estah gedangna. Bagi jelma ibahanna tempasna. Enca dung i tamakenna deher sapona, agakna keri setengah peisapen dekahna erdalin. Janah ibas sada wari, i buatna me manuk megara i gelehna, janah i buatna dareh buka-bukana, ate-atena, rak-rakna ras dalang-dalangna, je nari i sulangkenna man gana-gana e. Je nari i bas-bas me alu purih tonggal janeh nina : “Enda kbere ko au dareh buka-buka, ate-ate, rak-rak, ras dalang-dalang manuk megara, gelang engko man sembah-sembahen kalak si mentas, janah engko me jadi sirulahi man kalak simegombang arah dalin enda”.
Enca wari si e, lit kenca kalak mentas nina : “O silih, adi mentas arah e, ola kam lupa ertoto, encibalken isapndu. Sebab keramat si ah ndai banci nampati kam, adi mehamat jumpa rejeki kam, adi lang bancing kam i rulahina. Sikurangna kari mesui kal takalndu i bahanna”.
Erkiteken ingan gana-gana e pe bagi si mejin ka kin tuhu, enca i je nari melala me tuhu kalak ertoto ras ercibal ibas gana-gana e. “Ola kal aku bangger-bangger, adi runtung binagangku banci kubereken man bandu luahku nini …”
Sekali lit perlanja gutul. La ia nggit pecibal isapna sadape, Pa Ampuk gelarna. Enca ia lepus lit i begina sora “O Pa Ampuk, O Pa Ampuk, engkai makana engko megombang ibas inganku enda?” peltep-peltep sorana.
Enca seh i jahe minter mekelek bangger Pa Ampuk jenari mate. Mbar kel minter beritana kerna perpate Pa Ampuk. Emaka reh biarna jelma kubas gana-gana e . Ise pe lanai pang meliam janah megombang kubas ingan gana-gana e. Janah dalin sada e kel ngenca.
Pa Ngatoi karaben kenca lawes kugana-gana muati persembahen ras cibal-cibalen kalak perlanja, nguda denga kal ia si Mamang gelarna. Ia sung pecibal sung lang. Tapi sekal pe labo mesui takalna. Sekali muat engkahe, nina Pa Ngatoi “O Mamang .. engko ola ko denggo bagi perlanja Pa Ampuk. Petual-tualken ije, minter ampuk”
“Ue Pa,” nina si Mamang. Tapi enca seh bas gana-gana e, lawes ia kuteruh kayu ah. Ibuatina peldang melala. Je nari lit deba i bentingkenna deba itamana bas bulangna gelah mejin kal man tatapen. Ibas wari si e melala kal tuhu perlanja mentas pesawaen i gugung nari ras i jahe nari. Kerina ertoto ras ercibal ka i je. Seh kal biarna kerina man begu gana-gana e. Reh me tuhu Pa Ngatoi muati cibal-cibalen ras persembahen kalak perlanja. Wari si e mate-mate bulan. Kenca ben gelap kal ibas ingan gana-gana e. Asum tanna muati duit lit sora nina
“Ola buati, ajangku kap ena!” sora e mejin, galang janah peltep-peltep.
“Erbanko pe aku,” nina Pa Ngatoi.
“Ola buat,” nina ka sora e.
“Erbanko pe aku nge,” nina ka Pa Ngatoi, tapi enggo jergeh kal mbuluna janah mbelin talakna.
“Ola buat, kubunuh ko kari,” nina ka sora e.
“Sip ko,” nina Pa Ngatoi, tapi enggo seh kal biarna.
Rempet reh keramat e, mbur kel bulangna peldang janah kerina dagingna e peldagen. “Mate nge engko,” nina sorana peltep-peltep mejin.
Lompat Pa Ngatoi kiam belin ku sapona.
“Ha … ha … ha …!” nina sora tawa keramat e. Seh i sapona minter ampar Pa Ngatoi. Minter i suruh sekalak-sekalak perlanja ngelegi guru. Tapi langa denga kalak si berkat e erjingkang, enggo mate Pa Ngatoi. Bagem rawana keramat e. Kenca si e terberita ibas kuta-kuta deherken ingan Pa Ngatoi ras kerina perlanja si kae kolu maka Pa Ngatoi i ulahi gana-ganana. Janah i umpamaken kalak bagi gana-gana sarunggitgit, bekasna ngangana, ia ka mbiar”
Tapi si Mamang, i bunikenna tuhu-tuhu rusia enda. Ibuatina saja gel-gel persembahen kalak si mentas. Lanai pedah ia latih kahe kolu erlanja muat nakan. Janah enggo datsa kuan-kuan “Ola encidahken rusia, adi dat kalak rusianta nggeluh bene me kita.”
Ndehara Pa Ngatoi pe lawes ibas barung-barungna e nari, mulih ku kutana.
sumber : Tenah Budaya Karo , http://www.sinabungjaya.com/?p=76481

Tidak ada komentar:

Posting Komentar